HMANGAIH BER ZORAM TAN

Zan khat chu ka lehkha zir zo, mutmu tuah ka han tum mai a. Mahse, rin ang ngawt a ni ta lo, ka ngaihtuahnaah bu anga min khuar nghettu thil pakhat avang chuan mut zai reng reng ka rel thei mauh lo va. Tichuan, tukverh kawngkhar te hawngin Vur-thlifim thaw hiau hiau dawng chunga pawn lam thlira ka mit ka lenlai takin "Khai le, nangteh Zoram tan hian engnge i tih ve dawn? tiin zawhna pakhat chuan min rawn thawng thut mai a!!!.. Chu zawhna lah chu tihluihna a tel lo tihah kan chiang em emin leh Hmangaih Ber Zoram hian atana thawktu a mamawh tawh hle a ni tih te ka varpawh nghal a.

He zawhna ka rilrua a lo lan phat atang hian mahni tan chauha nung tur ka ni lo tih min hriat tir nghal bawk a. Tin, mahni tan chauha nun ka lo tum vethinna te chuan thiam loh min rawn chan tir a, zahruk chemchemna te hian min rawn delhkilh lehzel bawk a ni. Tin, Hmangaih Ber Zoram tana thawk tura midang ka lo phut rilruk mai thinna te chu Vur thlifim chuan min lenbo sak ta duak mai a. Mahni insehruhin ka thei emaw, thei lo emaw, ka tling emaw, tling lo emaw, ka thiam emaw, thiam lo emaw tih lam ngaihtuahna neih aingawt chuan tum mulmal nei ran chunga ka thawhchhuah a pawimawh ber zawk ta tiin ka nunpum chu Hmangaih Zoram Tan hian hrui angin min zial ta zel a ni.

Tin, Zoram tihah tak hian chian hmasat a pawimawh tih te hi ka rilruah a rawn lang hmasa leh a. A ni, ka tleirawl chhuah hlim chuan Zoram tia ka hriat fo chu tuna India rama Mizoram State khu ka hmehbel hmiah thin a, a thelh chiang hle. Tin, ZO TAWNG tih pawh hi DUHLIAN TAWNG ( MIZO TAWNG tia kan hriat lar) chauh hi emaw tiin ZO tawng dang te chu ka lo hlamchhiah mai thin bawk a. Mahse, hei, ZO hnam lo dinchhuaktu leh ZO hnamana min siamtu PATHIAN zarah ka hriatna te lo pung chho ve zelin ka ngaihdan hlui thing puipui mai chu min tih danglam sak ta a, chungril takin a hlimawm hle. Chutih hnuah zet chuan ZO tawng hi chi hrang hrang kan lo nei reng mai a, a zavai mai hian PATHIAN siam vek a lo ni zawk tih te, ZORAM tih hian ZO FATEN biktaka awmhmun kan khuarna ram thum, mahse International boundary-in a thenhran, India, Myanmar leh Bangladesh te hi a lo huam reng a ni tih te pawh ka hmu thiam tan ta uar a ni. Tin, ka thil hriatthiam thar avang hian Duhlian tawng hmang lo unau dang te pawh rilru leh thinlung takin ka hmangaih thei ta mai a. Heizet hi zawng, insuihkhawmna thu kan tih rik fona atana rahbi pawimawh tak a ni, tih te varpawh lehzelin, ka tan chuan PIANTHAR VAWIHNIHNA EMAW, HNAMA PIANTHARNA EMAW ka ti lo thei lo hial a. He piantharna changzet lo te hian "INSUIHKHAWM ZAI I REL ANG U" tih thupuite hi ka lo sawi rawtui ve ringawt ang tih pawh ka hlau hlel lo ve. Kan hnamin a nghahfak thalairual te'n he piantharna chang hmasa zet lo hian ZO HNAM tan thahnem ngai in ti ve tak siin, Zo hnam tan hna kan thawk palh ang tih pawh a hlauhawm hle mai. Chuti a nih zawngin, insuihkhawm aiin inpheldarhsarhna lam zawngin kan kal ngei ang a, a tawpa tawpah chuan ZO HNAM hi chawr no lo zetin an sawi---Van Kanan Ram kan panpui thlawn hne hne mai dawn a ni berin kan chanchin thangkhawk tur pawh a chuan nahawm lo hle ang.

Tihian entirna atan sakhal han khai dawn ila. Pangpar huana mawi taka parvul chitin reng mai hian chu huan chu a ti mawi thin. Rose par emaw, Lily par emaw, Senhri par emaw mawina chauh chuan chu huan chu a ti mawi tluantling thei mai lova, par dang nen an zavaia lungrual taka an theihna zawn theuh atanga parmawi ti vula an partlanna eng atang chauhvin huan mawi tak nihna hming a rawn pu chauh thin a ni. Tin, partinten an indipdal fo erawh thung chuan parmawi chhuah chu sawi loh, a parkung ringawt pawh ding hlei thei lovin a awm ang a, a tawp a tluin a tawih ral riai riai mai ang. He entirna ang chiah hian keini ZO FA, chi-leh-kuang tlang hrang hranga lengzate pawh hi ze-mawi hrang hrang kan ni nuk a. LUSEI chauh emaw, TEDDIM chauh emaw, HALKHA chauh emaw,FALAM chauh emaw hi ZO HNAM ti mawitu a tan an tling ber lo va, anni baka ZO HNAM chi hrang hrang la awmte nena lungrual taka insuihkhawmna hrui vuan a, lenzana atang chauh hian Hmangaih Zoram hi ti mawi tluantling theitu turte kan ni. A tumah mah Indipdal lo a, lungrual taka kan thawh ho phawt chuan he Vanhnuai pialleiah hian ZO HNAM sak hming hi a dai ngai tawh lo ang a , a vul reng zawk tawh dawn a ni. Hnam khata min lo siamtu kan biak PATHIAN pawhin Zo Hnam hi chutimaia a thamral a phal lo a ni tih pawh ringhlel lovin inhmangaihtawnna nen lenza kan tum a hun ta.

Chuvangin, keini, ZO HNAM Valrualte leh Lanu lengzawngte hian kan hnam tan kan thawk chhuak ngam dawn lawm ni? TUI LEH THLARAU-ah nilo, HNAM-ah I piangtharin, kan piangthar tawh em? Hnam inpumkhata insuikhawmna kawnga ngaihdan zim tak kan neih thinna tlang kha kalsan in Zo Hnam tan ngaihtuahna thar nen kan fehchhuak ngam tawh em? tih te hi mahniah kan inchik fo tur in kan hun tawnin a hril hle tawh a ni. Nang leh kei hi Zo Hnam tan hian kan dinhmun engnge ni le?

Hawh u, kan ngaituahnate hi Hhmangaih Ber Zoram Tan chirhtui anga a lo hnam thar zelna turin kan hnathawh rah te, kan zirna rah te leh kan thiltihtheihna kawng engkim mai hi kan hnam tan chauh ni lo, hnam khata min siamtu---kan PATHIAN ROPUI ZIA ti langsar lehzualtu atana hman tangkai tum tlat in , khawvel thila Mi ropui emaw, mi hausa emaw, Mi thiltithei tak emaw, Mi hmingthang tak emaw nih ngawt tum mai lovin, kan mimal nihna ang ang hi uizawnghum mai lo a, kan biak Pathian tan leh Zo hnam tana hlutna kawng khat tal neih tum a hun ta. Chuti anih zawngin ka thiamna leh ropuina thangkhawk chu dar benthak ri ang maiin kan hnam leh Pathian tan hlutna engmah lo mai a ni dawn a ni. Chuvangin, keini, Zo hnam chhunga chi-leh-kuang hrang hrangte hian kan awmna tlang theuh atangin kan hnam tana Hlutna nei mipakhat kan nih ngei theihna atan kan puanven laite hi sawichhing sauh sauhin leh kan thlen chin chin atang hian "Hmangaih Ber Zoram Tan" hmatiang sawn zai i rel ang u.