lolutrawh

2010-02-20T06:30:00.002+03:00

Hmangaihna hi a hluin a thuk em a ni.Engtin nge ka hriat thiam teh lul ang ni
Kei ang tan hian hmangaihna hi a hlu zual em em a ni.Hmangaihna tello chuan khawvel hi ka tan rumna mai a lo ni ang.

Tihian a tha em?

2010-02-20T06:15:00.002+03:00

Ka tleirawl chhuahhlim chuan leng U (val & nula upate) hi mak ka ti thin khawp mai .Engvange nupui pasal an neih loh? tiin ka lo ngaihtuah buai fo thin.Ka mihriat Valupa pakhat phei chu amah Bemtu NULA pawh a nei nual , nei ve mai turah ka ngai a a nei mai lo tlat mai. Engvang nge ni tih ka'n zawh chuan ... atan chuan nupui neih kha phurrit a nih thu min lo hrilh hleuh mai zu nia.Nupa nihna piah lama mawhphurhna tamtak hmanchhawn turin inpuahchah a ngai a ni maw? tih ka hriatphah uar ta mai.

Kan tih fuh loh nia ka hriat te:

Hnam fing angin inchal tum er teh mah ila kan thiltih phung reng hian kan la hnufual zia a ti lang fo thin niin ka hria. Kan NU leh PA te hun kha chu sawi phak a ni lo.Mahse keini hunah tak ngial pawh eitur a awm hma hauh hian eitu tur tih pun chak em em tlangval thaza tak tak hi (nupui chu eitu atan chauh va lak luh an ni tih a kawk kher lo a nia )kan tam em em thin.Hmangaihna chawivawng hlur a chhungkua kan han din tawp thin hi chu kan dawnthui lo deuh lo maw?.Hetiang na na na chu fanau kan han nei a nupa pa a eibar zawnga feh chhuah a lo tul a, kan rila rah kan fanau te thenawmte kawm pawn vela kan tlat tir a, kan sum zawn buai ah kan fate'n eng nge an tih thin tih pawh kan hre hek lo.
Thing leh lung delh loh na na na chu an rawn thang lian ve a , nu leh pate thlazar hnuaia sei lian lo na na na chuan khawlai nun an lo than hnan der tawh a. Chutih hunah pawh chuan NU LEH PA TE chu sum zawn buaiin kan la buai a.Nu leh pate thlazar hnuaia lehkha zir hman lo na na na chuan mahni tal talin an lo tal ve a...hetih kar hian naupang thenkhat te chu tha ve tak pawh an awm , mahse a tamzawk hi chu khawlohna thisenin zungzam a fan raih raih tawh mai a ni.Chutah pawh NU leh Pa te kan la harh lo fo va...khawnge " mami /mama hi a naupan lai khan kan rethei em a...ka duat hman silo tiin" sum kan neih ang ang kan vurh tan ta a...hetah chiah hian a pawisa kha a tipawi zual thin.Engvang chuan maw? Ehh!! kan fapa leh fanu te an pian tirh atanga an tleirawl chhuah thlengin kan thlazarhnuaia uap lum hman lo na na na chu an rilru kan man lo , tin, pawh/tlang /dik takin an thiltih tur min hrilh ngam ringawt hlei nem! A naupan lai tang khan zirtir hman lovin sumzawn lamah kan buai em a lawm !Dikna ngaina turte , aiupa zahthiam turte,Tawngtai thlahthlam lo turte leh Sum hmandan thiam turte khan kan zirtir hman lo tlat a lawm.Hetiang vang hian khawtalngah buaipui tham fe fe fa kan nei thluah zawng a nih hi!

Hei mai hi a la ni nem! mami/mamate'n an naupan lai a zawhna min zawh thin " A NU /A PA heihi Engvang nge ? Engtin nge?Eng tik ah nge? Khawiah nge? adt zawhna chi tam tak an zawh thin che khan engtin nge kan chhan thin kha? Atam zawk chuan Naupang hriat a tul lo! emaw Ve a che! in kan chhang thin . Hetianga an thilthar hriat chakna kan lo tih bulh hmak hmak thin vang hian an rawn puitliang chova ... zirna kawngah hlawhtlinna tak tak an phur chhuak zo tawh thin lo.Tunlai thilthar ngaihtuah/siamchhuahna khawvel ah hian kan fate'n hnuhma an neih theih loh phah hial a ni. Apple kung atanga APPLE lei a tla thlir liam ta mai lova :Engvanga tla nge ? a nih tia Dilchhut taka chhui chiangtu Miropui NEWTON-a kha kan lo hre ve lo pawh ni fa hmiang!

Tin, sumpai tlachham reng renga chhungkua din na na na chu NUPA kar thu chhiat chang a lo awm thin , fanaute benghriat mai nilo mit ngei maia an hmuhtheih ah NU PA kan in kawt deuh tuar tuar mai thin te hian kan FATE hmakhua kan tih thim sak leh thin.Lehkha zirlai an nih phei chuan zirna thlengin a nghawng chhe vek thei tlat a ni.Chuvangin chhungkua dinna ah hian sumpai hian hmunsang a luah pha tlat tih hre tlatin chhungkua din hma ngeiin i khawlkhawm sa ang u.(tamtak tihna zawng a ni lo ve)

keini thangtharte hunah chuan a chunga thil tlemte thupui tak tak hi hre reng i la tha dawn mange aw! Aw tlangval te u kan kawppuite tan innghahna tling khawp kan nih hma chuan chhungkua i din mai lo vang u. Nula te u fate pa tur hi i hmangaih ringawt khan duh tawk mai rih lo la...hmangaih chung reng khan chhungkua pakhat chawm thei tur khawp a innghahna tlak a nih hun thleng tha leh chakna pe chung zela rinawm takain nghak hram hram ang u hmiang! Tin, Nulate U keimahni ah ngei pawh hian hei hi inchik fo thin ang u " ka fanau lo piang turte tan NUTLING ni thei turin ka inzir tawk fawng tawh em ? "tih hi . Chuti a nih loh zawngin ka fate lola piang turte hi khawvel thiamna/finna lama hnuh luh aiin a thim lamah kan nawrliam mai palh ang tih pawh hlauhawm tak a ni e.

Tichuan , hengte hi i hre tlat ang u.....
Kan vela Naupangin Dil chhut taka thil min zawh hunin kan hriat ang ang chu tha taka chhan i zir ang u....
Kan vela naupangte'n zawhna thar an siam thiam zel theih nan i zir tir thin ang u
Eitur a awm hmain Eitu tur in lak luh hi ...i simthar ang u....

Mizo zirlaite leh sawrkharhna

2010-02-20T05:16:00.005+03:00

MSF Hruaitute’n thuziak tura min sawmna ka hmuhin ziah tur ka van khawp a.Eng nge ziak ila tha ang tia ka ngaihtuah laiin Ram leh Hnam tana zir ,kei ni mizo zirlaite tana pawimawh em ema ka hriat Sawrkar hnathawh chungchang tawitea ziak turin kan in siam rem ta a ni..Sawrkarhna a nih angin a sang emaw ahniam emaw chu ka sawi tum ber a ni lo anga , sawrkar hna a nihna leh a hlutna tak ka rawn sawi dawn a ni.Sawrkarhna thawk kher lo pawhin ram leh hnam tan mi tangkai a nih theih tho va, hetah hi chuan sawrkarhna thawh lam ka rawn sawi dawn a ni.Kan thalai rualte'n sawrkarhna thawk vek se ka ti miah lo va, thawk kan tlem lutuk erawh a tha lo hle a ni.

Kan Bible kan en chuan Babulon lal Nebukadnezzara kut hnuaia rinawm taka sawrkar hna lo thawk thin Daniela , Pharoa kut hnuaia thawk Josepha ,Lal Artazerzia hnuaia thawk Nehemia leh midang tam te chanchin kan hmu thei a.Heng mite hi ram leh hnam tan an tangkai hle a ni tih pawh kan hmu thei bawk.

Kan ram sumzawnna harsat thu chu kan hre theuh va.Tumah dem theih kan ni hlawm lo.Ama’rawhchu keini mizo zirlai rual ram leh hnam tana zirte hian thil kan thlir reng rengin mahni chhungbil tan chauhva thlir lo va ram leh hnam tana thlir dan thiam tum ila kan hnam tan mi tangkai tak kan la ni ve dawn a ni.

Hetihian han thlir ta ila , Tahan leh achhehvelah hian mizo thalai degree nei sangtel kan awm tawh ang a .Tahan leh achhehvel High Schoola zirtir thawkte hi han en leh ta ila ram leh hnam tana zir thin kan thalai rualte kha kut tang thliah tham awrh chauh kan hmu ang.Thufing 22:6 ah chuan “Naupang chu a kalna awm kawngah chuan zirtir ula , a upat hun pawhin a thlah lo vang” tiin a in ziak kuau mai a.High schoola kan naupang te hi nakin lawka kan hnam hruaitu turte an ni hlawm tih kan hre theuh a.Tin, Nu leh Pa tam zawkte hi ei bar zawn buaiah fate tha takin an uap lum hman thin lo va.Keini thalai rualin chawlhkar khatah darker thum chhung vel Naupang Sunday school inkhawmah Pathian thu hrilhin kan lo uap lum thin chauh a ni a. Heng kan naupangte hi kan hnamtana mi tangkai ni thei turin kan chher danah a innghat nasa hle mai a.Ka sawi tum tak chu Chawlhkar khat chhunga darker 3 chhung vel uap lum mai ni tawh lo vin nitin mai kan chher hriamna hnuaiah awm thei se a va tha teh lul dawn ve .

Chutiang tur chuan engtin nge kan tih ang? Hma thlir thui tak kan neih a ngai dawn a ni.Kan naupang tam zawk hi chu high school rap vek an ni a.An classroom thleng rawiha` kan umzui peih a ngai dawn tihna a nih ber chu.Chumi atan chuan a umzuiturte’n sawrkar hna kan thawk a ngai ta pang mai le!Cheiraw! khawnge ram leh hnamtana zir thin mizo thalai rual kha kan thawk chhuak dawn lom ni?

Tin, thil pakhat finchhuaha kan hriat atana tha em em chu .Khawi ramah pawh sawrkar hnathawkte hi an hnampuite tan an tangkai em em a.An hnampui te tan darthlalang an ni thin. Kalay University ah pawh Saya Riangvela,Saya Biaka ,Saya Muanliana leh kan mi leh sa sawrkar hnathawkte khi mi tamtakin kan tangkai pui nasa reng a ni.Mimal takin an hausa therthur lo nain kan mite tan an hlu em em tih piah lamah kan hmai uanna ber te an hi hlawm ngei ang.

Thil reng reng hi hun rei tak thleng daih turin ngaihtuah thiam i la, chumi atana harsatna lo thleng thei pawh tuar huam bawk thin i la.Chuti nilo va a ler atanga thuai tum nghal ringawt hi kan chhiat phah thin reng a ni.General Aung Sana chuan "A tha ber dawng thei tur khawpa tan la in , achheber lo thleng pawh tuar thei turin ka inbuatsaih thin" a lo ti a ni. Kan hnam hi sawrkarpain min zahder,ngaih pawimawh kan duh chuan sawrkarhna kan ngainat thiam a tul tlat a ni.Kan sawi tawh angin hausakna atan a ni lo, ram leh hnam tan a ni zawk.Hetiang lamah hian mizo zirlai rualte kan fin a hun tawh hle a ni.Kan khawtlanga sawrkarhna thawk kan hmuhdante pawh siam that a hun ta hle mai.

Tuna kan zirlai rual leh degree la tawh zianga mithenkhatte hi tun hnu kum 10 velah tahan leh a chhehvel sawrkar office hmun hrang hrangah nihna chelh hlawm ila chuan he kan ramah hian kan hnam hi sawrkarpain a ngaipawimawh hle tawh anga , kan hnam hmai pawh a uang ta ve ang!

MY PHOTOS

2009-07-24T04:05:00.003+04:00

Nula Tlangvalte tan

2009-07-24T03:59:00.001+04:00

THE MOSCOW METRO

2009-02-23T19:12:00.004+03:00

Kan chenna khawvelah hian anitelin mihring kan lo pung tual tual a, inkal pawhna ah pawh kan lo changkang chho zela.Lei chungmai ni tawh lovin leihnuai lam atanga in kal pawh te pawh a lo tul chho zela.
Chutiang zelin Russia ram MOSCOW ah pawh khawpui cheng mihring an tam em avangin lei chung inkal pawhna mai chuan thil a ni thei lo tih chu RUSSIAN mithiamte’n an lo hre daih tawh a.Keini ZOFATE’N tlangram vela nitin eichawp hmua lungawi em ema kan awm lai khan LEIHNUAI REL KAWNG hi an lo siam tan tawh ani.
1933 march ni 20 khan SOVIET sawrkar chuan he LEIHNUAI rel kawng hi a siam tana.Inziniaring thiam tak takte leh hnathawktu tam tawk hmangin bul atan ta a ni.Tichuan kumhnih an thawh hnu chuan REL hmasa ber chu chawlhhmun pahnih PARK KUL-TUR-RI(CULTURE PARK) leh SA-KOL-NIK-KI (SAKOLNIKI—hei hi MOSCOW KHAWPUi huam chhunga DISTRICT pakhat hming ani.) atlan zawm tan a ni(chawlhhmun pahnih chauh a la awm tihna)
Tichuan , rambuai lai 1941-45 inkarah pawh chawlh zairel lovin an siam chhunzawm zela..tunthleng hian chawlhhmun thar leh kawng thar siam mek zel ani.Thiamna rawn sang chho zel chuan tihdantha leh mawite rawn hring tel zelin tunah chuan he METRO hi MOSCOW khawpui timawitu pakhat a ni tawh hial awm e.Moscow mite chuan an chhuang em em a ni.
2003 may thla khan MOSCOW sawrkar chuan mipui hnenah chawlhhmun thar “PARK A-BIA-DI(VICTORY PARK) chu hlanin hawnna hun ropui tak hman a ni bawk.He chawlh hmun hi ‘CHAWLH HMUN THUK BER” a ni.Lei hnuai Metre 97 a thukah a awm.He station atanga nieng hmu tur chuan rahka kal thei (esclator) meter 126 zeta sei chuan choh tur dah a ni.
Tunah chuan THE MOSCOW METRO ah hian chawlhhmun 165 siam a ni tawh(siam belh a la ni zel bawk), kal kawng zawng zawng seizawng belh khawmin kilometer 264 a tling a ni.
Metro rel kal chak zawng chawhrualin darkar khatah kilometer 41 a chakin a tlan thin.A chhunga hnathawk zawng zawng singthumsanga tha (35000) an ni.Chawlhhmun pakhat siam nan hian dollar maktaduai sarih atang sawmpanga inkar sen a ni.
Awle ..he METRO hi a lun em em ri ngawt mai.Abiktakin zing lam hnathawh kal hun leh Tlailam hnathawh ban hunah mihring an tam tlangpui.Tin a man thuah chuan vawikhat chuan man hi 22 rubel a ni.($1 hi 25-35 rubel in kar a ni)Lei chung kan chhuah loh phawt chuan nileng paw’n chuang kual hrep mah ila 22rubel hi senbelh a ngai tawh lo.Lei chung kan chhuah erawh chuan chawlhhmun pakhat lek pawh nise luh leh hunah ticket thar lei zel a tul ani.
Awle kan ZORAMah hetianga in kal pawhna a awm ve hun tur nghakhlel takin….han thlir ho phawt teh ang u aw….

HNAM HLA

2009-02-18T11:52:00.002+03:00

KA ZIRTIRTUPA & A NUPUI

2009-02-17T21:16:00.000+03:00

He THLALAK hi RUSSIA TAWNG min zirtirtu BLAGEMIP SAFRONOF-A leh A NUPUI MARINA-I te an ni.Kum 2007 SEPT thla atang 2008 MARCH thleng , MAY-MYO (PYIN-OO-LWIN) DEFENCE SERVICE ACADEMY - 2(D.S.A-2 tia an koh mai thin) ah RUSSIA TAWNG min zirtir .Myanmar sawrkar chuan HMATHLIR zautak neiin kum 1999 vel atang tawh khan THALAI RUAL lehkha zirturin RUSSIA ramah a lo thawn tawh thin.Kum 2018 thleng hian thawn zel atum thu hriat ani.Heng RUSSIA rama a thawn ho tur reng reng hian MAY-MYO D.S.A-2 ah hian kumkhat chhung RUSSIA tawng zir leh thildang training na an nei thin.A bik takin SIPAI lam an in thawn tlangpui.2007 hian KEI NI (CIVIL SERVICE)vawikhat min thawnna niin sipai lam erawh vawi -8 an thawnna ani.2008 sept thla khan RUSSIA RAM MOSCOW chu tlunagtein kan thleng .An thawn tawh zingah hian TLANGMI an la awm lo.Tun tumah erawh chuan pa 4 kan tel...chungte chu salai-CUNG LIAN SIANG (M.E/ ani hi FALAM TLANGVAL ANI.);Mr-BU HUNG (M,Sc/a ni hi MINDAT tlangval a ni.):Mr-WAR HTANG (M,Sc/ a ni hi MATUPI tlangval ani) leh Salai-LALRAMLAWMA(keimah) te kan ni.SAKHAW lam atanga thlir chuan KAREN TLANGVAL NAW-DINA nen KRISTIAN 5 kan awm.RUSSIAN ramah erawh chuan kan kaina UNIVERSITY leh KAN AWMNA khua a in ang lo nuaih mai.

Kan sawrkar hian CIVIL lam a koh hmel tawh loh vangin TLANGMI awm chhun kan ni mai tawh dawn a ang hle.

HMANGAIH BER ZORAM TAN

2008-12-01T00:36:00.000+03:00

Zan khat chu ka lehkha zir zo, mutmu tuah ka han tum mai a. Mahse, rin ang ngawt a ni ta lo, ka ngaihtuahnaah bu anga min khuar nghettu thil pakhat avang chuan mut zai reng reng ka rel thei mauh lo va. Tichuan, tukverh kawngkhar te hawngin Vur-thlifim thaw hiau hiau dawng chunga pawn lam thlira ka mit ka lenlai takin "Khai le, nangteh Zoram tan hian engnge i tih ve dawn? tiin zawhna pakhat chuan min rawn thawng thut mai a!!!.. Chu zawhna lah chu tihluihna a tel lo tihah kan chiang em emin leh Hmangaih Ber Zoram hian atana thawktu a mamawh tawh hle a ni tih te ka varpawh nghal a.

He zawhna ka rilrua a lo lan phat atang hian mahni tan chauha nung tur ka ni lo tih min hriat tir nghal bawk a. Tin, mahni tan chauha nun ka lo tum vethinna te chuan thiam loh min rawn chan tir a, zahruk chemchemna te hian min rawn delhkilh lehzel bawk a ni. Tin, Hmangaih Ber Zoram tana thawk tura midang ka lo phut rilruk mai thinna te chu Vur thlifim chuan min lenbo sak ta duak mai a. Mahni insehruhin ka thei emaw, thei lo emaw, ka tling emaw, tling lo emaw, ka thiam emaw, thiam lo emaw tih lam ngaihtuahna neih aingawt chuan tum mulmal nei ran chunga ka thawhchhuah a pawimawh ber zawk ta tiin ka nunpum chu Hmangaih Zoram Tan hian hrui angin min zial ta zel a ni.

Tin, Zoram tihah tak hian chian hmasat a pawimawh tih te hi ka rilruah a rawn lang hmasa leh a. A ni, ka tleirawl chhuah hlim chuan Zoram tia ka hriat fo chu tuna India rama Mizoram State khu ka hmehbel hmiah thin a, a thelh chiang hle. Tin, ZO TAWNG tih pawh hi DUHLIAN TAWNG ( MIZO TAWNG tia kan hriat lar) chauh hi emaw tiin ZO tawng dang te chu ka lo hlamchhiah mai thin bawk a. Mahse, hei, ZO hnam lo dinchhuaktu leh ZO hnamana min siamtu PATHIAN zarah ka hriatna te lo pung chho ve zelin ka ngaihdan hlui thing puipui mai chu min tih danglam sak ta a, chungril takin a hlimawm hle. Chutih hnuah zet chuan ZO tawng hi chi hrang hrang kan lo nei reng mai a, a zavai mai hian PATHIAN siam vek a lo ni zawk tih te, ZORAM tih hian ZO FATEN biktaka awmhmun kan khuarna ram thum, mahse International boundary-in a thenhran, India, Myanmar leh Bangladesh te hi a lo huam reng a ni tih te pawh ka hmu thiam tan ta uar a ni. Tin, ka thil hriatthiam thar avang hian Duhlian tawng hmang lo unau dang te pawh rilru leh thinlung takin ka hmangaih thei ta mai a. Heizet hi zawng, insuihkhawmna thu kan tih rik fona atana rahbi pawimawh tak a ni, tih te varpawh lehzelin, ka tan chuan PIANTHAR VAWIHNIHNA EMAW, HNAMA PIANTHARNA EMAW ka ti lo thei lo hial a. He piantharna changzet lo te hian "INSUIHKHAWM ZAI I REL ANG U" tih thupuite hi ka lo sawi rawtui ve ringawt ang tih pawh ka hlau hlel lo ve. Kan hnamin a nghahfak thalairual te'n he piantharna chang hmasa zet lo hian ZO HNAM tan thahnem ngai in ti ve tak siin, Zo hnam tan hna kan thawk palh ang tih pawh a hlauhawm hle mai. Chuti a nih zawngin, insuihkhawm aiin inpheldarhsarhna lam zawngin kan kal ngei ang a, a tawpa tawpah chuan ZO HNAM hi chawr no lo zetin an sawi---Van Kanan Ram kan panpui thlawn hne hne mai dawn a ni berin kan chanchin thangkhawk tur pawh a chuan nahawm lo hle ang.

Tihian entirna atan sakhal han khai dawn ila. Pangpar huana mawi taka parvul chitin reng mai hian chu huan chu a ti mawi thin. Rose par emaw, Lily par emaw, Senhri par emaw mawina chauh chuan chu huan chu a ti mawi tluantling thei mai lova, par dang nen an zavaia lungrual taka an theihna zawn theuh atanga parmawi ti vula an partlanna eng atang chauhvin huan mawi tak nihna hming a rawn pu chauh thin a ni. Tin, partinten an indipdal fo erawh thung chuan parmawi chhuah chu sawi loh, a parkung ringawt pawh ding hlei thei lovin a awm ang a, a tawp a tluin a tawih ral riai riai mai ang. He entirna ang chiah hian keini ZO FA, chi-leh-kuang tlang hrang hranga lengzate pawh hi ze-mawi hrang hrang kan ni nuk a. LUSEI chauh emaw, TEDDIM chauh emaw, HALKHA chauh emaw,FALAM chauh emaw hi ZO HNAM ti mawitu a tan an tling ber lo va, anni baka ZO HNAM chi hrang hrang la awmte nena lungrual taka insuihkhawmna hrui vuan a, lenzana atang chauh hian Hmangaih Zoram hi ti mawi tluantling theitu turte kan ni. A tumah mah Indipdal lo a, lungrual taka kan thawh ho phawt chuan he Vanhnuai pialleiah hian ZO HNAM sak hming hi a dai ngai tawh lo ang a , a vul reng zawk tawh dawn a ni. Hnam khata min lo siamtu kan biak PATHIAN pawhin Zo Hnam hi chutimaia a thamral a phal lo a ni tih pawh ringhlel lovin inhmangaihtawnna nen lenza kan tum a hun ta.

Chuvangin, keini, ZO HNAM Valrualte leh Lanu lengzawngte hian kan hnam tan kan thawk chhuak ngam dawn lawm ni? TUI LEH THLARAU-ah nilo, HNAM-ah I piangtharin, kan piangthar tawh em? Hnam inpumkhata insuikhawmna kawnga ngaihdan zim tak kan neih thinna tlang kha kalsan in Zo Hnam tan ngaihtuahna thar nen kan fehchhuak ngam tawh em? tih te hi mahniah kan inchik fo tur in kan hun tawnin a hril hle tawh a ni. Nang leh kei hi Zo Hnam tan hian kan dinhmun engnge ni le?

Hawh u, kan ngaituahnate hi Hhmangaih Ber Zoram Tan chirhtui anga a lo hnam thar zelna turin kan hnathawh rah te, kan zirna rah te leh kan thiltihtheihna kawng engkim mai hi kan hnam tan chauh ni lo, hnam khata min siamtu---kan PATHIAN ROPUI ZIA ti langsar lehzualtu atana hman tangkai tum tlat in , khawvel thila Mi ropui emaw, mi hausa emaw, Mi thiltithei tak emaw, Mi hmingthang tak emaw nih ngawt tum mai lovin, kan mimal nihna ang ang hi uizawnghum mai lo a, kan biak Pathian tan leh Zo hnam tana hlutna kawng khat tal neih tum a hun ta. Chuti anih zawngin ka thiamna leh ropuina thangkhawk chu dar benthak ri ang maiin kan hnam leh Pathian tan hlutna engmah lo mai a ni dawn a ni. Chuvangin, keini, Zo hnam chhunga chi-leh-kuang hrang hrangte hian kan awmna tlang theuh atangin kan hnam tana Hlutna nei mipakhat kan nih ngei theihna atan kan puanven laite hi sawichhing sauh sauhin leh kan thlen chin chin atang hian "Hmangaih Ber Zoram Tan" hmatiang sawn zai i rel ang u.

VIEW OF KALAYMYO

2008-11-15T12:57:00.000+03:00

KA NU DUH TAK

2008-11-06T18:48:00.000+03:00

Ka NU chu e.........ZO NU lungmawl ve mai a ni

Thiam zirna run....... a rap sang lo

Sappui tawng pawh a thiam hek lo

Mahse ka hriat leh thiam .....sappui tawng leh thiamna zawng hi..

Min hmangaihtu ka NU min thawh sak rah ani.....

Ka NU chu e.....harsatna leh buaina ah pawh

ka tan tawlhlohpuan a veng thin

Keimah vangin ....hrehawm tamtak a tuar ngei a,

Ka dawn kirin.......min hmangaihzia ka hre zo lo

THIAM ZIRNA RUNSANG rap thei tura

Min lo tawrhsakna chauh pawhi....a nasa in ....

Ka hre zo lo a .....

KA NU min hmangaihna hi.......

Ka NU chuan e........ka tan PATHIAN min dawrsak thin...

Tunah rih chuan mualza tamtak in hlat rih in

Siamtu PATHIAN khawngaih zarah damte'n kanin

Tawn leh ni chuan , lawmthu hrilhin

A tang nemah ,awihlai nauang ka bei nang e....

RED SQUARE THLALAK LEH KEI ZOVALA

2008-11-06T04:23:00.000+03:00

Hei le !
Russia tawng kan zir tan tirha kan zir tir ten an chhuan em em ,an sawi fo thin moscow khawpui laili an hmun chu ka va thleng ve ta hlawl la ti chuan thla ka rawn la a,in thiam lo deuh chungin ka 'n dah chhuak ve ta hlawl a ni. center moscow ah hin red square ,biakin pui,kremlin siangpa hrang kulh,world war -2 hriat rengna mei mitthei lo leh veng tu sipai duty reng te,historical museum te a awm ani,red square a hmun pakhat ah chuan PU LENINA ruang an zalhna hmun a awma,tlawhtu a la nei fo a ni.

lush niki khel mual

2008-11-06T04:11:00.000+03:00

he khelmual leh MOSCOW STATE UNIVERSITY daidang tu chu moscow river hi ani.He lui hnuai ah hian leihnuai rel < metro>kawng a tlang a ni.

KAN NUNIN PATHIAN I CHAWIMAWI ANG U

2008-11-06T03:49:00.000+03:00

A hmasa berin he bloga rawn leng lut zawng zawng krista isua hmingin chi bai ka buk a che u.

Tunlai kan khawvel hun tawnah hian tha lai te'n kan nun ngei a krista ka hman a pawimawh hle.
Khawvel ah hian pathianah a nih loh chuan thil dang engmahah lawmna kim a awm thei lo tih hi krismas hmang tam deuh chuan an hre awm me.Chuvangin khawi hmuna kan awm pawh in kan nun ngei hian Pathian i chawimawi ang u.